ഗോള്‍ മഴയുമായി മാഞ്ചസ്റ്റര്‍ സിറ്റി; എഫ് എ കപ്പില്‍ തകര്‍പ്പന്‍ വിജയം

എഫ് എ കപ്പില്‍ തകര്‍പ്പന്‍ വിജയവുമായി മാഞ്ചസ്റ്റര്‍ സിറ്റി. എഫ് എ കപ്പ് മൂന്നാം റൗണ്ടില്‍ സാല്‍ഫോര്‍ഡ് സിറ്റിക്കെതിരെ നടന്ന മത്സരത്തില്‍ എതിരില്ലാത്ത എട്ട് ഗോളിനാണ് സിറ്റി വിജയം സ്വന്തമാക്കിയത്. സിറ്റിക്ക് വേണ്ടി ജെയിംസ് മക്കാറ്റി ഹാട്രിക് നേടി തിളങ്ങിയപ്പോള്‍ ജെറമി ഡോകു ഇരട്ടഗോളുകളും നേടി.

ഇത്തിഹാദ് സ്‌റ്റേഡിയത്തില്‍ നടന്ന മത്സരത്തിന്റെ തുടക്കത്തില്‍ തന്നെ സിറ്റി ഗോള്‍വേട്ടയ്ക്ക് തുടക്കമിട്ടു. എട്ടാം മിനിറ്റില്‍ ജെറമി ഡോകുവാണ് സ്‌കോറിങ് തുറന്നത്. 20-ാം മിനിറ്റില്‍ ഡിവിന്‍ മുബാമ സിറ്റിയുടെ സ്‌കോര്‍ ഇരട്ടിയാക്കി. 43-ാം മിനിറ്റില്‍ നിക്കോ ഒറെയ്‌ലി സിറ്റിയുടെ മൂന്നാം ഗോളും നേടി.

രണ്ടാം പകുതിയുടെ തുടക്കത്തില്‍ തന്നെ സിറ്റി ഗോളടി തുടര്‍ന്നു. 49-ാം മിനിറ്റില്‍ പെനാല്‍റ്റി ഗോളാക്കി മാറ്റി ജാക്ക് ഗ്രീലിഷ് സിറ്റിയുടെ സ്‌കോര്‍ ഉയര്‍ത്തിയതോടെ സ്‌കോര്‍ 4-0 എന്നായി. 62-ാം മിനിറ്റില്‍ ജെയിംസ് മക്കാറ്റി അക്കൗണ്ട് തുറന്നു. 69-ാം മിനിറ്റില്‍ വീണ്ടും പെനാല്‍റ്റി. പെനാല്‍റ്റി ഗോളാക്കി മാറ്റി ജെറമി ഡോകു തന്റെ രണ്ടാം ഗോള്‍ നേടി. 72, 81 മിനിറ്റില്‍ വല കുലുക്കി ജെയിംസ് മക്കാറ്റി ഹാട്രിക് പൂര്‍ത്തിയാക്കി.

Content Highlights: FA Cup: Manchester City crush Salford City